Piše: Elfrida Matuč-Mahulja

I baš ću pisat po domaću. Aš san jadna (ovdi jadna ne znači brižna nego da mi je puni kufer!)

Dunkve, prišlo mi je javit se z molbu jednomu našemu cjenjenomu Društvu a sve kako bi me primili za svoga člana. I napisala san lipo ja tu molbu sve kako piše va njihovomu Statutu i poslala na poštu preporučeno.
Za par dani mi zvoni mobitel i nika ženska me pita ko san to ja.

 

- "Da ja san, nego ki bi drugi bil!?"
- "Draga moja šjora, ma Vi nan niste poslali sve ča rabi va Vašoj molbi!"
- "A ča san Van rabila poslat? Ja san Van poslala ono ča piše va Vašemu Statutu."
- "A ne, ne... Morate nan poslat baren tri Vaši libri i podatki o Vami. Onako kako to jimaju drugi člani napisano."
- "Ma šjora moja draga, a kadi to piše da Van ja to moran poslat? Kako bin i od kuda ja znala ča Van poslat??"
- "Pogjedajte tamo kadi su drugi člani pa ćete vidit!!!"
- "Ma tamo kadi su drugi člani nikimi članimi već leto dan piše samo jime i prezime i niš drugo! I oprostite ma nigdir na Vašoj internet stranici ne piše da moran pogjedat ča piše kod drugih člani da bin znala kako Van poslat molbu."

- "Mrmlj... Vi meni to sve pošaljite ča san Van rekla i gotovo!"
- "Dobro! Bog."
-"Bog."

Ben, ne budi lena poslala san sve ča je iskala. Poslala san njin čak i libar na ćirilici - to je bilo prvo pol leta. Valjda još vavik čitaju taj libar kad mi se još dan danaska nisu javili. Ni A ni B. Ni tovare nisi ti za nas! A ja san mislela da oni jimaju veze zi kulturu! Ma tako san mislila i za puno drugih pak mi se istešo niki ni javil niti mi odgovoril kad san ča pitala.

Glavno je da ja ispadan munjena aš ne znan kako poslat molbu za ku nigdire ne piše kako ju napisat odnosno ča čovik rabi poslat.

Ma i ovako munjena ja vidin da njin tamo, a oni su niki judi od jezika već jako dugo vrimena piše da jimaju 205 člana - t'r i mi Boduli ki govorimo svakako, smo čuli za sklanjanje i deklinaciju pak rečemo da jimamo 205 člani, pak se pitan ča su zada 205 pozabili stavit točkicu ili su pozabili materinji jezik!??

Ili je vero sve va ovoj zemji šlo mater ženit!

Bog!

Komentari

Dodaj Novi

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."